బమ్మెర పోతన : పోతనకు సమర్పించిన ఉత్పల మాలిక
పోతనకు సమర్పించిన ఉత్పల మాలిక
శతావధాని, సుకవి, శ్రీ మద్దూరి రామమూర్తి గారు
శతావధాని, సుకవి, శ్రీ మద్దూరి రామమూర్తి గారు
1) శ్రీకరమై, సుధీజన వశీకరమై, శ్రితలోక నిత్య ర
2) క్షాకరమై, శ్రుతిస్వర లయాంచిత పూజిత వాగ్విశేష ర
3) మ్యాకరమై ,సతీపతి రమాపతి వాక్పతి భోగభాగ్య భ
4) వ్యాకరమై, విరాజిత విహార విలాస సుశస్త్ర హస్త భూ
5) పాకరమై, వణిగ్వర సమార్జిత మౌక్తిక విద్రుమాది ర
6) త్నాకరమై, రమేశ పదజాద్భుత దాన విశేషలబ్ధ కీ
7) ర్త్యాకరమై, సుగంధ భరితాద్భుత పుష్పిత దివ్య భవ్య ప
8) ద్మాకరమై, నిరంతర మహామృడ పాద సమర్చనాత్త భ
9) క్త్యాకరమై, కృతీందు వదనార్థ రసాన్విత వాగ్విలాస కా
10) వ్యాకరమై, నిరంతర సహాయక దాన విధాన లబ్ధ ధ
11) ర్మాకరమై, సుధర్మ సమమై, తత శత్రుసమూహ భేక ద
12) ర్వీకరమై, గుణాన్విత వివేక విశుద్ధ మహానుభూతి దూ
13) రీకృత దుష్టయై, నృపవరేణ్య విరాజితయై వెలుంగు నీ
14) కాకతి ముఖ్యపట్టణముగావిలసిల్లెడు నోరుగంటిలో
15) లోకసఖుండునౌ శశి విలోకన చంద్రిక లెల్లగూడి తా
16) మేకములై మహోజ్జ్వలత పృథ్విని భక్తి ఫలించు రీతిగా
17) నేకశిలాపురిన్ బుధ కవీంద్ర హృదబ్జము లుల్లసిల్లగా
18) నాకము పుష్పవృష్టి నభినందనముల్ వెదజల్లుచుండ తా
19) నేకళ నుండెనో జగదధీశ్వర పుత్రుడు సృష్టిజేసె న
20) స్తోకరసప్రవాహ పరిశోభిత మూర్తిని పోతనాహ్వయున్
21) శోకము బాపు సూత్రమును జూపగ భాగవతమ్ము వ్రాయ వా
22) ణ్యాకృతితో జనించె రవియైకవితల్లజులెల్ల మెచ్చగా
23) ఆకమనీయ ఘంటమున కంతటి శక్తి లభింప హేతువే
24) మో!కలకండ శర్కరయొ? పొల్పగు నిక్షురసమ్మొ? పాలతో
25) పాకము పట్టి తేనియ ద్రవమ్మున ఘంటము ముంచితో భళీ!
26) యాకమనీయ కావ్యమహహా!జగదేక యశమ్మునందె. ని
27) క్ష్వాకుకులప్రదీపుడగు స్వామి పదాబ్జము నెమ్మనంబునన్
28) ప్రాకట భక్తిగొల్చి రఘురామున కంకితమిచ్చి వేడ్క వి
29) ద్యాకమలాక్షి దివ్య కరుణాబ్జ మరందము నాను తేటియై
30) లోకులు మెచ్చగా పదములున్వచనంబులు పల్కులందు మా
31) రాకుగ విచ్చురీతి కవిరాజు రచించె మనోజ్ఞ కావ్యమున్
32) ఈకరణిన్ దిగంతముల హృద్యత భాగవతమ్ము మించి వా
33) ణీకర వల్లకీ కృతుల నిత్యము వర్ధిలుగాత! భవ్య శౌ
34) ర్యాకర ధర్మరక్షిత విరాజిత రాజస లోకపాలనా
35) లోకన మించుగాత! సురలోక సుఖప్రద ప్రాగ్జనుః కృతా
36) శోకసమూల నాశిని సుశోభిత వర్ణిని పద్మనేత్రయున్
37) నాకముఖుల్ మునీశ్వరులు జ్ఞానుల దీవనలంది సర్వమున్
38) శ్రీకర శోభలంది విలసిల్లుత! జ్ఞాన సరస్వతీ కృపా
39) శీకరముల్ మనోజ్ఞమయ జీవికలై కృతి నోముగాత! య
40) స్తోకతమః ప్రభావమును సోకగ నీక వెలుంగు నింపుచున్
41) నాకమనీయమౌ కృతి జనమ్ము మనమ్మున నిల్చురీతి ర
42) త్నాకర గర్భజాత వనితామణి శ్రీరమ మందహాసియై
43) చేకొని సాకుగాత! ఘన శీతల శైల కుమారిసర్వ లో
44) కైకజనిత్రి శాంకరి దృగంచల వర్షిత చంద్రచంద్రికా
45) స్తోకకృపాంబురాశి పరితోషిత జేయుత కావ్యరాజమున్
46) నాకుమనంబు పొంగ వదనమ్మున మంగళ భావ వీచికల్
47) తేకువ మీర కన్పడగ తృప్తిగ ధీవరులెల్ల మెచ్చగా
48) నీకృతి యామనిన్ పికము హేలగ మోద మొసంగునట్లు, శో
49) భాకరమౌచు చిల్క తన పల్కుల సందడి నింపినట్టు లిం
50) పౌకమనీయ నృత్య గరిమమ్మున కేకి నటించినట్లు, సొం
51) పైకలహంస కుల్కులు సమంచిత భావము నింపునట్లుగా
52) స్వీకృత కౌముదీ రుచుల ప్రీతిగ మెచ్చిన జక్కవాంగనల్
53) చీకటిలోన వెన్నెలను చిత్రముగా గమనించినట్లు, దో
54) షాకరు డబ్ధి ఘోషలకు సంతసమంది వెలుంగునట్లు, లో
55) కైకయశమ్మునంది కలకాలము మంజుల నవ్యభావ సం
56) ఖ్యాకమనీయ రూపమయ కాంతుల నింపి రసజ్ఞులైన యీ
57) లోకుల గుండెలోతుల విలోకన చేయును గాత మంచు నే
58) తేకువమీర గూర్చితిని దీప్తిగ పోతనపైన మాలికన్
59) స్వీకృత హృద్య పద్య పరిబృంహిత మద్దురి రామమూర్తి ప్ర
60) జ్ఞాకవి కృష్టి వర్ణితము జ్ఞాన నిధానము సర్వ దేవతా
61) నీకము తారకా సహిత నిత్యచరుల్ రవి చంద్రు లబ్ధులున్
62) ప్రాకట పంచ భూతములు భవ్య కవిత్వ మహత్వ సిద్ధు లెం
63) దాకరహించు నంతవడి తప్పక భాగవతమ్ము వెల్గుతన్.