బాల ద్విపద భాగవతం : భాగం 11
1001
ద్రౌణిధిక్కృతియు, శాంతనవ[278] సంస్థితియు,
రాణించు ధర్మజు రాజ్యాధిగమము,
శౌరిద్వారక ప్రవేశంబు సేయుటయు,
శ్రీరమ్యుఁడగు పరీక్షితుని జన్మంబు,
ఆంబికేయుని యరణ్యప్రవేశంబు,
నంబుజాక్షుఁడు విజయంబు సేయుటయు,
పాండునందన మహాప్రస్థాన నిధియు,
పాండవమధ్యమపౌత్ర దిగ్జయము,
కలిభంజనము, శృంగి ఘనశాప గతియు,
నిలఱేఁడు గంగకునేఁగి నిల్చుటయు,
నలువొందు శుక దర్శనంబును నాఁగఁ
గలప్రథమస్కంధ కథలును మఱియు
నాదిఁబరీక్షితుండడిగిన తెఱగు,
నాదృతుండైన ఖట్వాంగు మోక్షంబు,
నొప్పారు ధారణాయోగ లక్షణము,
నప్పరమేశుని యవతార నుతియు,
బ్రహ్మదేవుండు తపంబొనర్చుటయు,
బ్రహ్మకు విష్ణుండు ప్రత్యక్షమగుట,
బ్రహ్మయు హరియును భాషించు తెఱఁగు,
బ్రహ్మనారదుల సంభాషణ క్రమము,
[278] శాంతనవుఁడు- శంతనుని కుమారుడు, భీష్ముఁడు
1011
నొనరెడు దశలక్షణోదాహరణము
ననువేరుఁ గల ద్వితీయస్కంధ కథలు
పొసఁగి యలంకారపూర్ణమై చెలగి
యసమానమగు ప్రథమాశ్వాసమయ్యె