అష్టమస్కంధః : సప్తమోఽధ్యాయః - 7
8-7-1
శ్రీశుక ఉవాచ
తే నాగరాజమామంత్ర్య ఫలభాగేన వాసుకిం .
పరివీయ గిరౌ తస్మిన్ నేత్రమబ్ధిం ముదాన్వితాః
8-7-2
ఆరేభిరే సుసంయత్తా అమృతార్థే కురూద్వహ .
హరిః పురస్తాజ్జగృహే పూర్వం దేవాస్తతోఽభవన్
8-7-3
తన్నైచ్ఛన్ దైత్యపతయో మహాపురుషచేష్టితం .
న గృహ్ణీమో వయం పుచ్ఛమహేరంగమమంగలం
8-7-4
స్వాధ్యాయశ్రుతసంపన్నాః ప్రఖ్యాతా జన్మకర్మభిః .
ఇతి తూష్ణీం స్థితాన్ దైత్యాన్ విలోక్య పురుషోత్తమః .
స్మయమానో విసృజ్యాగ్రం పుచ్ఛం జగ్రాహ సామరః
8-7-5
కృతస్థానవిభాగాస్త ఏవం కశ్యపనందనాః .
మమంథుః పరమాయత్తా అమృతార్థం పయోనిధిం
8-7-6
మథ్యమానేఽర్ణవే సోఽద్రిరనాధారో హ్యపోఽవిశత్ .
ధ్రియమాణోఽపి బలిభిర్గౌరవాత్పాండునందన
8-7-7
తే సునిర్విణ్ణమనసః పరిమ్లానముఖశ్రియః .
ఆసన్ స్వపౌరుషే నష్టే దైవేనాతిబలీయసా
8-7-8
విలోక్య విఘ్నేశవిధిం తదేశ్వరో
దురంతవీర్యోఽవితథాభిసంధిః .
కృత్వా వపుః కాచ్ఛపమద్భుతం మహత్ప్రవిశ్య
తోయం గిరిముజ్జహార
8-7-9
సర్వత్ర గోవిందనామసంకీర్తనం గోవింద గోవింద .
తముత్థితం వీక్ష్య కులాచలం పునః
సముద్యతా నిర్మథితుం సురాసురాః .
దధార పృష్ఠేన స లక్షయోజన-
ప్రస్తారిణా ద్వీప ఇవాపరో మహాన్
8-7-10
సురాసురేంద్రైర్భుజవీర్యవేపితం
పరిభ్రమంతం గిరిమంగ పృష్ఠతః .
బిభ్రత్తదావర్తనమాదికచ్ఛపో
మేనేఽఙ్గకండూయనమప్రమేయః
8-7-11
తథాసురానావిశదాసురేణ
రూపేణ తేషాం బలవీర్యమీరయన్ .
ఉద్దీపయన్ దేవగణాంశ్చ విష్ణుర్దైవేన
నాగేంద్రమబోధరూపః
8-7-12
ఉపర్యగేంద్రం గిరిరాడివాన్య
ఆక్రమ్య హస్తేన సహస్రబాహుః .
తస్థౌ దివి బ్రహ్మభవేంద్రముఖ్యై-
రభిష్టువద్భిః సుమనోఽభివృష్టః
8-7-13
ఉపర్యధశ్చాత్మని గోత్రనేత్రయోః
పరేణ తే ప్రావిశతా సమేధితాః .
మమంథురబ్ధిం తరసా మదోత్కటా
మహాద్రిణా క్షోభితనక్రచక్రం
8-7-14
అహీంద్రసాహస్రకఠోరదృఙ్ముఖ-
శ్వాసాగ్నిధూమాహతవర్చసోఽసురాః .
పౌలోమకాలేయబలీల్వలాదయో
దవాగ్నిదగ్ధాః సరలా ఇవాభవన్
8-7-15
దేవాంశ్చ తచ్ఛ్వాసశిఖాహతప్రభాన్
ధూమ్రాంబరస్రగ్వరకంచుకాననాన్ .
సమభ్యవర్షన్ భగవద్వశా ఘనా
వవుః సముద్రోర్మ్యుపగూఢవాయవః
8-7-16
మథ్యమానాత్తథా సింధోర్దేవాసురవరూథపైః .
యదా సుధా న జాయేత నిర్మమంథాజితః స్వయం
8-7-17
మేఘశ్యామః కనకపరిధిః కర్ణవిద్యోతవిద్యున్మూర్ధ్ని
భ్రాజద్విలులితకచః స్రగ్ధరో రక్తనేత్రః .
జైత్రైర్దోర్భిర్జగదభయదైర్దందశూకం గృహీత్వా
మథ్నన్ మథ్నా ప్రతిగిరిరివాశోభతాథో ధృతాద్రిః
8-7-18
నిర్మథ్యమానాదుదధేరభూద్విషం
మహోల్బణం హాలహలాహ్వమగ్రతః .
సంభ్రాంతమీనోన్మకరాహికచ్ఛపా-
త్తిమిద్విపగ్రాహతిమింగిలాకులాత్
8-7-19
తదుగ్రవేగం దిశి దిశ్యుపర్యధో
విసర్పదుత్సర్పదసహ్యమప్రతి .
భీతాః ప్రజా దుద్రువురంగ సేశ్వరా
అరక్ష్యమాణాః శరణం సదాశివం
8-7-20
విలోక్య తం దేవవరం త్రిలోక్యా
భవాయ దేవ్యాభిమతం మునీనాం .
ఆసీనమద్రావపవర్గహేతోస్తపో
జుషాణం స్తుతిభిః ప్రణేముః
8-7-21
ప్రజాపతయ ఊచుః
దేవదేవ మహాదేవ భూతాత్మన్ భూతభావన .
త్రాహి నః శరణాపన్నాంస్త్రైలోక్యదహనాద్విషాత్
8-7-22
త్వమేకః సర్వజగత ఈశ్వరో బంధమోక్షయోః .
తం త్వామర్చంతి కుశలాః ప్రపన్నార్తిహరం గురుం
8-7-23
గుణమయ్యా స్వశక్త్యాస్య సర్గస్థిత్యప్యయాన్ విభో .
ధత్సే యదా స్వదృగ్భూమన్ బ్రహ్మవిష్ణుశివాభిధాం
8-7-24
త్వం బ్రహ్మ పరమం గుహ్యం సదసద్భావభావనః .
నానాశక్తిభిరాభాతస్త్వమాత్మా జగదీశ్వరః
8-7-25
త్వం శబ్దయోనిర్జగదాదిరాత్మా
ప్రాణేంద్రియద్రవ్యగుణస్వభావః .
కాలః క్రతుః సత్యమృతం చ ధర్మ-
స్త్వయ్యక్షరం యత్త్రివృదామనంతి
8-7-26
అగ్నిర్ముఖం తేఽఖిలదేవతాత్మా
క్షితిం విదుర్లోకభవాంఘ్రిపంకజం .
కాలం గతిం తేఽఖిలదేవతాత్మనో
దిశశ్చ కర్ణౌ రసనం జలేశం
8-7-27
నాభిర్నభస్తే శ్వసనం నభస్వాన్
సూర్యశ్చ చక్షూంషి జలం స్మ రేతః .
పరావరాత్మాశ్రయణం తవాత్మా
సోమో మనో ద్యౌర్భగవన్ శిరస్తే
8-7-28
కుక్షిః సముద్రా గిరయోఽస్థిసంఘా
రోమాణి సర్వౌషధివీరుధస్తే .
ఛందాంసి సాక్షాత్తవ సప్తధాతవ-
స్త్రయీమయాత్మన్ హృదయం సర్వధర్మః
8-7-29
ముఖాని పంచోపనిషదస్తవేశ
యైస్త్రింశదష్టోత్తరమంత్రవర్గః .
యత్తచ్ఛివాఖ్యం పరమార్థతత్త్వం
దేవ స్వయంజ్యోతిరవస్థితిస్తే
8-7-30
ఛాయా త్వధర్మోర్మిషు యైర్విసర్గో
నేత్రత్రయం సత్త్వరజస్తమాంసి .
సాంఖ్యాత్మనః శాస్త్రకృతస్తవేక్షా
ఛందోమయో దేవ ఋషిః పురాణః
8-7-31
న తే గిరిత్రాఖిలలోకపాల-
విరించవైకుంఠసురేంద్రగమ్యం .
జ్యోతిః పరం యత్ర రజస్తమశ్చ
సత్త్వం న యద్బ్రహ్మ నిరస్తభేదం
8-7-32
కామాధ్వరత్రిపురకాలగరాద్యనేకభూతద్రుహః
క్షపయతః స్తుతయే న తత్తే .
యస్త్వంతకాల ఇదమాత్మకృతం స్వనేత్ర-
వహ్నిస్ఫులింగశిఖయా భసితం న వేద
8-7-33
యే త్వాత్మరామగురుభిర్హృది చింతితాంఘ్రిద్వంద్వం
చరంతముమయా తపసాభితప్తం .
కత్థంత ఉగ్రపురుషం నిరతం శ్మశానే
తే నూనమూతిమవిదంస్తవ హాతలజ్జాః
8-7-34
తత్తస్య తే సదసతోః పరతః పరస్య
నాంజః స్వరూపగమనే ప్రభవంతి భూమ్నః .
బ్రహ్మాదయః కిముత సంస్తవనే వయం తు
తత్సర్గసర్గవిషయా అపి శక్తిమాత్రం
8-7-35
ఏతత్పరం ప్రపశ్యామో న పరం తే మహేశ్వర .
మృడనాయ హి లోకస్య వ్యక్తిస్తేఽవ్యక్తకర్మణః
8-7-36
శ్రీశుక ఉవాచ
తద్వీక్ష్య వ్యసనం తాసాం కృపయా భృశపీడితః .
సర్వభూతసుహృద్దేవ ఇదమాహ సతీం ప్రియాం
8-7-37
శివ ఉవాచ
అహో బత భవాన్యేతత్ప్రజానాం పశ్య వైశసం .
క్షీరోదమథనోద్భూతాత్కాలకూటాదుపస్థితం
8-7-38
ఆసాం ప్రాణపరీప్సూనాం విధేయమభయం హి మే .
ఏతావాన్ హి ప్రభోరర్థో యద్దీనపరిపాలనం
8-7-39
ప్రాణైః స్వైః ప్రాణినః పాంతి సాధవః క్షణభంగురైః .
బద్ధవైరేషు భూతేషు మోహితేష్వాత్మమాయయా
8-7-40
పుంసః కృపయతో భద్రే సర్వాత్మా ప్రీయతే హరిః .
ప్రీతే హరౌ భగవతి ప్రీయేఽహం సచరాచరః .
తస్మాదిదం గరం భుంజే ప్రజానాం స్వస్తిరస్తు మే
8-7-41
శ్రీశుక ఉవాచ
ఏవమామంత్ర్య భగవాన్ భవానీం విశ్వభావనః .
తద్విషం జగ్ధుమారేభే ప్రభావజ్ఞాన్వమోదత
8-7-42
తతః కరతలీకృత్య వ్యాపి హాలాహలం విషం .
అభక్షయన్మహాదేవః కృపయా భూతభావనః
8-7-43
హర హర నమః పార్వతీపతయే హర హర మహాదేవ
తస్యాపి దర్శయామాస స్వవీర్యం జలకల్మషః .
యచ్చకార గలే నీలం తచ్చ సాధోర్విభూషణం
8-7-44
తప్యంతే లోకతాపేన సాధవః ప్రాయశో జనాః .
పరమారాధనం తద్ధి పురుషస్యాఖిలాత్మనః
8-7-45
నిశమ్య కర్మ తచ్ఛంభోర్దేవదేవస్య మీఢుషః .
ప్రజా దాక్షాయణీ బ్రహ్మా వైకుంఠశ్చ శశంసిరే
8-7-46
ప్రస్కన్నం పిబతః పాణేర్యత్కించిజ్జగృహుః స్మ తత్ .
వృశ్చికాహివిషౌషధ్యో దందశూకాశ్చ యేఽపరే
8-7-47
ఇతి శ్రీమద్భాగవతే మహాపురాణే పారమహంస్యాం సమ్హితాయాం
అష్టమస్కంధే అమృతమథనే సప్తమోఽధ్యాయః